Մելիքական տիտղոս ստացած Օհանը վերադառնում է Արցախից և իր ժողովրդով նախապես բնակություն հաստատում Ծակերի ձորու
Մելիք-Օհանի՝ Ծակերի ձորում նախապես բնակություն հաստատելը վկայում է նրա կողմից ձորի հյուսիսային մասում՝ Կամի ձորակում, Շոր ջուր վտակի աջ ափին, իր և ծնողների, մասնավորապես հոր՝ Բաղրի (խոջա Լազարի (Ղազարի) թոռը) հիշատակին կառուցած ոչ մեծ բազիլիկ եկեղեցու բարավորի հետևյալ արձանագրությունը.
«ՅԻՇԱՏԱԿ Է † ԵԿԵՂ/ԵՑԻՍ ՄԷԼԻՔ/ՈՀԱՆԻՆ ԵՒ ԻՒՐ /ԾՆՈՂԱՑՆ ՊԱՂԸՐ/ԻՆ. ԹՎԻՆ: ՌՄԺԴ: (1765)»:
Մելիք-Օհանը չհիմնավորվեց Ծակերի ձորում: Որոշ ժամանակ անց, երբ Ձագեձորի հովտին այլևս չէին սպառնում թերեքեմե վաչկատուն ցեղերի ասպատակությունները, Մելիք-Օհանն իր և ծնողների հիշատակին եկեղեցի կառուցելուց հետո` որոշ ժամանակ անց (թերևս 1760-ական թվականների վերջերին), իր ժողովրդով մշտական բնակության վայր է ընտրում Ձագեձորի հովտի Լաստի խութ լեռան հյուսիսային լանջերն ակոսող ձորամիջում նախկինում գոյություն ունեցած բնակատեղին և հիմնում Նոր կամ Ներքին Գորիս (Ներքին Շեն) գյուղը և այն դարձնում նորահաստատ մելիքության գլխավոր նստոց-կենտրոն: Ինչպես ասվում է Հակոբ քհն. Տեր-Մինասյանի ինքնագիր «Հիշատակարան»-ում, «Թէ որ թվում, որ ժամանակ ինձ յայտնի չէ, Ծակերին ծորիցը փոխւում են այժմեան Գորիս գիւղը, է հարկէ Նոր գիւղ քցում, այդ յայտնի է այս գիւղի Ս. Հռիփսիմէ եկեղեցւոյ կանգնեցնելուց»: Այդ է փաստում նաև Մանուչար բեկ Մելիք-Հուսեինյանի ներկայացրած պատումը, համաձայն որի՝ Մելիք-Օհանը «…բնակութիւն է հաստատում նախ «Ծակերի ձորում», բայց յետոյ հիմնարկում է Նոր-Գորիս գիւղը և այնտեղ տեղափոխւում»:
Հոդվածի մեջբերման աղբյուրը․