1928 թվականից գործող Գորիսի բժշկական կենտրոնը 95 տարեկան է։ Կառույցն այսօր արդեն 329 աշխատակից ունի, իսկ հիվանդներին սպասարկում են բարձր որակավորում ունեցող 70 բժիշկներ։ 2010 թվականին հիմնանորոգված ԲԿ֊ն հագեցվել և անընդհատ հագեցվում է ժամանակակից սարքավորումներով:
Բժշկական կենտրոնն իրականացնում է հիվանդանոցային, արտահիվանդանոցային և շտապ օգնության ծառայություններ: 90 մահճակալ ունեցող կառույցում գործում են
•վիրաբուժական,
•մանկաբարձագինեկոլոգիական
•թերապևտիկ
•մանկական
•ինֆեկցիոն
•հեմոդիալիզային բաժանմունքները:
Այստեղ իրականցվում են պլանային և անհետաձգելի վիրաբուժական, վնասվածքաբանական, ուռոլոգիական, անոթային վիրաբուժական, քիթ-կոկորդ-ականջաբանական և մանկաբարձագինեկոլոգիական միջամտություններ և լապարոսկոպիկ վիրահատություններ: Բժշկական կենտրոնում գործում է ժամանակակից սարքավորումներով հագեցված լաբորատոր-գործիքային ախտորոշիչ ծառայություն, որը իրականացնում է մեզի, արյան (կլինիկական, բիոքիմիական, իմունոֆերմենտային, սեռոլոգիական) և գործիքային (ուլտրաձայնային, թվային ֆլյուրոգրաֆիա, էնդոսկոպիա, էլեկտրասրտագրում) համալիր հետազոտություններ: Լաբորատոր-գործիքային ախտորոշիչ ծառայությունները մատուցվում են նաև պետական պատվերի շրջանակներում անվճար՝ Գորիսի տարածաշրջանի բոլոր բնակիչների համար, իհարկե համապատասխան բժշկական ցուցումների և բուժող բժշկի ուղեգրի առկայության դեպքում:
Իսկ կենտրոնի պոլիկլինիկայում Գորիսի և տարածաշրջանի բնակչության առողջության առաջնային պահպանմանը հետևում են համապատասխան մասնագիտացում անցած 11 ընտանեկան բժիշկներ։ «Գորիսի բժշկական կենտրոն» ՓԲԸ֊ի շտապ օգնության ծառայությունը աշխատում է 24֊ժամյա գրաֆիկով և իր գործի մեջ հմուտ թիմով։ Վերջերս էլ այս ծառայությունը հագեցվել է նորագույն սարքավորումներով և տրանսպորտային միջոցներով, իսկ բուժանձնակազմը վերապատրաստվել կրթական ծրագրերով:
Ի դեպ՝ շտապ օգնության կանչերն իրականացվում են անվճար` պետական պատվերի շրջանակներում:
Եվ ամենակարևորը. «Գորիսի բժշկական կենտրոն» ՓԲԸ֊ում սպասարկումն իրականացվում է հոգատար և պրոֆեսիոնալ աշխատակազմի կողմից։
Աղբյուրը`
