Տաթև Սողոյանն իր ֆեյսբուքյան էջում գրել է.
ՈՒՇԱԴՐՈՒԹՅՈՒՆ ԼՐԱԳՐՈՂՆԵՐԻՆ ԵՎ ՈՉ ՄԻԱՅՆ
Այսօր Երևանի քաղաքապետարանի պաշտոնական կայք էջում տեղադրվել է հետևյալ հայտարարությունը․
«Երևանի քաղաքապետի լիազոր ներկայացուցչի 09.06.2021 թվականի որոշմամբ ի գիտություն է ընդունվել ՀՀ քաղաքացիներ Արմեն Խոջոյանի և Վահագն Հովակիմյանի իրազեկումը՝ ս.թ. հունիսի 21-ին՝ ժ.10.00-22.00 Հանրապետության հրապարակում հավաք անցկացնելու վերաբերյալ»:
Այսինքն՝ վերոնշյալ հայտարարությամբ չի նշվել որոշում կայացրած լիազորված անձի անունը, որոշման համարը և որ ամենակարևորն է՝ հավաքի անցկացման ՆՊԱՏԱԿԸ։
«Հավաքների ազատության մասին» օրենքի 14-րդ հոդվածի 1-ին մասի 3-րդ կետի համաձայն՝ հավաքի իրազեկման մեջ պետք է նշվի հավաքի նպատակը։Նույն օրենքի 5-րդ հոդվածի համաձայն՝
1. Հավաքների ազատությունը կարող է սահմանափակվել միայն այն դեպքում, երբ ժողովրդավարական հասարակությունում պետական անվտանգության և հասարակական կարգի պահպանումը, հանցագործությունների կանխումը, հանրության առողջության ու բարոյականության, այլոց հիմնական իրավունքների և ազատությունների պաշտպանությունը գերակայում են հավաքի ազատության նկատմամբ։
2. Արգելվում է հավաքների ազատության օգտագործումը սահմանադրական կարգը բռնի տապալելու, ազգային, ռասայական, կրոնական ատելություն բորբոքելու, բռնություն կամ պատերազմ քարոզելու նպատակով։
Հաշվի առնելով հանրապետությունում առկա ներքաղաքական լարված իրադրությունը և այն, որ սույն հավաքը պլանավորվում է անցկացնել նշանակված ընտրությունների հաջորդ օրը՝ լրագրողների ուշադրությունն եմ հրավիրում Երևանի քաղաքապետարանից ճշտելու ս.թ. հունիսի 21-ին՝ ժ.10.00-22.00 Հանրապետության հրապարակում անցկացվելիք հավաքի նպատակը, որոշում կայացրած լիազորված անձի անունը և որոշման համարը։
