Չորեքշաբթի ադրբեջանական «Ժողովրդական շարժում» հասարակական կազմակերպության մի խումբ անդամներ բողոքի ակցիա են անցկացրել Բաքվում Ռուսաստանի դեսպանատան դիմաց: Այս մասին տեղեկացնում է turan.az կայքը:
Գործողությունը համընկել է 11-րդ Կարմիր բանակի կողմից Ադրբեջանի խորհրդայնացման տարելիցի հետ:
Մասնակիցները պաստառ են բարձրացրել. «Մենք պահանջում ենք դուրս բերել ռուսական զորքերը Ադրբեջանից»: Ոստիկանությունը մասնակիցների ձեռքից վերցրել է պաստառները և նրանց հետ է տարել շենքից:
«Մենք պահանջում ենք ռուսների դուրսբերում Ղարաբաղից, նրանք խաղաղապահ չեն, թող նրանց փոխարինեն թուրք զինվորականները», – ասել է ցուցարարներից մեկը:
«Եթե ռուս զինվորականները «Իսկանդեր» հրթիռներ են արձակել Շուշիի ուղղությամբ, ապա ինչպե՞ս կարող են այդ զինվորականները համարվել խաղաղապահներ: Թող հեռանան»,-ասել է մեկ այլ մասնակից:
Կազմակերպիչները ԶԼՄ-ներում տարածել են ակցիայի բանաձևը, որում ասվում է, որ «Ժողովրդական շարժումը» ռուս զինվորականների ժամանումը համարում է ոտնձգություն Ադրբեջանի ինքնիշխանության դեմ:
Այս զինվորականները Ղարաբաղում չեն զբաղվում խաղաղապահությամբ, նրանք անում են ինչ ուզում են: Այս ամենը հակասում է Ադրբեջանի շահերին, ասվում է բանաձևում:
«Ժողովրդական շարժումը» հիմնադրվել է 2019 թվականին ՝ երկրի ներքին գործերի նախկին նախարար Իսքենդեր Համիդովի կողմից: Այս կառույցին անդամակցում են Հասարակական կազմակերպություններ և մի շարք քաղաքական կուսակցություններ:
Նյութի աղբյուրը՝ armday.am
