Արայիկ Պարոնյանը, անդրադառնալով Հայաստանի վերաբերմունքին ՌԴ-ի նկատմամբ, իր ֆեյսբուքյան էջում գրել է.

Հայկ Նահապետից մինչև Արտաշես Առաջին և Տիգրան Մեծ, մինչև Վարդան Մամիկոնյան և Գևորգ Մարզպետունի, մինչև Դավիթ-Բեկ և Մխիթար Սպարապետ, մինչև Սարդարապատ և Գարեգին Նժդեհ ու արցախյան հերոսամարտ Հայկական Բարձրավանդակը եղել է հայության գոյապայքարի թատերաբեմ: Իրավիճակը ավելի օրհասական է դառել Հայկական Բարձրավանդակ թուրքի ներխուժումով և այդ պահից սկսած մեր բնօրրանը վեր է ածվել Հայ ու թուրք տեսակի գոյության համար մղվող ռազմադաշտի: Թուրքն իր գոյությունը պայմանավորեց Հայի ֆիզիկական բնաջնջումով, որը կանխվեց միայն թուրքերի դեմ Հայ և Ռուս ժողովուրդների համատեղ պայքարում տարած հաղթանակների, դրա արդյունքում իրականացված Հայերի մեծ ներգաղթի, և ի վերջո Խորհրդային 70 տարիներին Հայ ազգի ռազմական, տնտեսական, հոգևոր-մշակութային ձեռքբերումների:

Իսկ, ի՞նչ էր անում արևմուտքը այդ ողջ ընթացքում, իհարկե քար լռություն, ինչպես արցախյան վերջին պատերազմում:

Բիսմարկն ասում էր. «Ռուսների հետ պետք է լինել կամ ազնիվ, կամ ոչ մի կերպ»:

Ազնի՞վ ենք եղել մենք վերջին 30 տարում ռուսների հետ, չգիտեմ: Ազնի՞վ են ռուսների հետ այսօրվա իշխանությունները, իհարկե ո՛չ, հետևաբար օրվա հրամայական է դառել նրանց հեռացումը և Ազգային Ժողովի արտահերթ ընտրությունների անցկացումը, որի ժամանակ Հայ ժողովուրդը կկանգնի ճակատագրական որոշում կայացնելու առաջ, քանզի ժողովրդի ընտրությունից է կախված լինելու, թե ովքեր են ձևավորելու Հայաստանում հաջորդ իշխանությունը. նրանք, ովքեր նպաստում են արևմտյան այլասերիչ, հակաքրիստոնեական բարքերի ներմուծումով Հայաստան և Հայաստանի վերջնական կործանմա՞նը, թե՞ այն ուժերը, ովքեր Ազգային-Քրիստոնյա Հայաստանի կառուցումը տեսնում են Ռուսաստանի հետ ազնիվ, դաշնակցային հարաբերությունների խորացման մեջ:

Վստահ եմ, որ Հայ ժողովուրդը կարթնանա խորը թմբիրից և կկատարի իր ճիշտ ընտրությունը դեպի Հայաստանի և Հայ ազգի դարավոր բարեկամ, ռազմավարական միակ դաշնակից Ռուսաստանի Դաշնություն:

Արայիկ Պարոնյան