Չգիտեմ, ինչքան դեռ կհոսի այս տեղեկատվական կեղտաջուրը, ինչքան ավերումներ կկատարի տեղեկատվական աղբահեղեղը, ինչքան կտևի բարոյական սահմանները վաղուց հատած ներքաղաքական գզվռտոցը: Չգիտեմ… Բայց գիտեմ մի բան՝ հեռու մնացեք Սյունիքից: Չփորձեք Սյունիքը վերածել քաղաքական մանրադրամի ու այն ծառայեցնել ձեր քաղաքական նպատակների իրականացմանը: Սյունիքը կա ու լինելու է: Անգամ միջնադարի խավարի մեջ այստեղ միշտ վառ է եղել ազգային ազատագրական պայքարի ու ազգային պետականության վերականգնման լույսը, լինելիության կամքն ու ոգին: Քաղաքական ավելորդ մանիպուլյացիաները, աճպարարությունները որևէ աղերս չունեն Սյունիքի ոգու ու իրական էության հետ: Թե չէ ի՞նչ է նշանակում՝ երևանյան հրապարակներում բացեիբաց հայտարարում են, թե Սյունիքում արդեն մարտեր են ընթանում, Ագարակում փոխհրաձգություն է, Խնձորեսկը հանձնեցին, Արավուսի ու Ներքին Խնձորեսկի բնակչությունը ստիպված հեռանում է: Եվ այս ամենը հայտարարում են սոցցանցերում, միտինգներում, հայտարարում են ինքնավստահ ու ինքնագոհ, իբր մտահոգ, իրենք էլ չհասկանալով, թե խոսքն ինչի մասին է ու նման հայտարարություններն ինչ ավերիչ հետևանքներ են ունենում տեղի բնակչության հոգեկան աշխարհի վրա: Վերջ տվեք այդ կեղծ ու սուտ հայտարարություններին: Քաղաքական մանիպուլյացիաների ու նպատակների համար ուրիշ միջոցներ փնտրեք, ուրիշ միջոցներ…
Անշուշտ նոր իրավիճակ է Սյունիքի համար, նոր խնդիրներով: Ու այս ամենը գիտակցում է ցանկացած սյունեցի՝ մեծից փոքր: Խուճապը, կոտրվելը սյունեցու համար չեն: Ձեր քաղաքականությամբ զբաղվեք…