Գորիսեցի Նարեկի կյանքը փրկվեց՝ «Արաբկիր» ԲՀ բժիշկների ջանքերով

Հերթական երեխայի կյանքը փրկվեց՝ «Արաբկիր» ԲՀ բժիշկների ջանքերով՝ Հայաստանի երեխաների առողջության հիմնադրամի ու պետության ֆինանսավորմամբ:

Լուսերես փոքրիկի` գորիսեցի Նարեկի մոտ 5 օրականում լեղուղիների ատրեզիա էր ախտորոշվել` ներլյարդային լեղուղիների բնածին բացակայություն: Երեխայի կյանքը կախված էր մեկ հնարավորությունից` լյարդի փոխպատվաստումից:

Փոքրիկն անմիջապես վերցվել է «Արաբկիր» բժշկական համալիրի մասնագետների (գաստրոէնտերոլոգ-հեպատոլոգների) հսկողության տակ եւ, համաձայն նման դեպքերի հաստատված չափորոշչի, նա պետք է մեծանար-հասներ 7-8 կիլոգրամ քաշի, ինչը սովորաբար լինում է 6-7 ամսականում, եւ ինչից հետո կիրականացվեր լյարդի փոխպատվաստումը:

Ամեն ինչ ընթանում էր բարեհաջող. Նարեկը մայրական կաթով կարողացել էր հասնել անհրաժեշտ քաշին, նախանշվել էր վիրահատության օրը` նոյեմբերի 1, բժիշկների թիմն ու գործընկերները պատրաստվում էին այդ օրվան: Սակայն եղավ անցանկալին. սուր շնչառական վարակի հետեւանքով Նարեկի մոտ արագ զարգացան լյարդային անբավարարության երեւույթներ, որոնք խախտեցին ամբողջ ծրագրերը: Խնդիրն արդեն ժամերի մեջ գործն արագ կազմակերպելն էր, ինչը, որքան էլ անհավանական կարող է թվալ, հաջողվեց:

Գործընկեր բժիշկների մի մասը Երեւան եկավ Մինսկից, մի մասը` Մոսկվայից, մյուսը` Կորեայից:

Փոխպատվաստման վիրահատությունն իրականացվեց հոկտեմբերի 29-ին: Նարեկին իր լյարդի մի մասը նվիրեց հայրիկը:

Վիրահատությունն անցել է սահուն: Շնորհակալ ենք բոլոր մասնագետներին:

Երեխան եւ բժիշկներն այս պահին դեռեւս հետվիրահատական դժվար ճանապարհ են անցնում` քայլ առ քայլ առաջ գնալով եւ ամեն օր ավելի դրական արդյունքներ ունենալով:

Այս դժվարին օրերին, ինչպես միշտ, երեխայի կողքին է կանգնած Հայաստանի երեխաների առողջության հիմնադրամը: Հիմնադրամի ֆինանսական աջակցությունը, որը հնարավոր է դառնում հասարակության բարեսիրտ նվիրաբերություններով, չափազանց կարեւոր է, քանի որ վիրահատության ծախսերը քառակի ավելի շատ են պետական աջակցության չափից:

Սա պետություն-բարեգործական կազմակերպություն-բժշկական հաստատություն համագործակցության գեղեցիկ օրինակ է` հանուն երեխայի կյանքի:

Կրկին շնորհակալ ենք բոլորին:

Առողջություն Նարեկին ու բոլոր երեխաներին:

Արմեն Մարտիրոսյան

Հայաստանի երեխաների առողջության հիմնադրամ