Գորիսի համայնքապետ Առուշ Առուշանյանը սահմանամերձ բնակավայրերում ծանոթացել է իրականացվող աշխատանքներին և լսել բնակիչների խնդիրները
Գորիս համայնքի ղեկավար Առուշ Առուշանյանը աշխատանքային այց է կատարել Որոտան, Շուռնուխ և Բարձրավան սահմանամերձ բնակավայրեր՝ տեղում ծանոթանալու իրականացվող ծրագրերի ընթացքին, հանդիպելու բնակիչներին և լսելու նրանց խնդիրները:
Որոտանում Առուշանյանը նշել է, որ մինչև հոկտեմբերի 10-ը գործընկեր կազմակերպության հետ կմեկնարկեն 20 կմ խմելու ջրի կառուցման աշխատանքները, ինչը էականորեն կբարելավի բնակավայրի ջրամատակարարումը։Համայնքը արդեն կառուցել է 5 կմ-ը, իսկ մինչև հոկտեմբերի 10-ը խողովակները կմատակարարվեն մնացած 20 կմ-ը կառուցելու համար։ Սա էականորեն կբարելավի բնակավայրի ջրամատակարարումը։ Բացի այդ, Որոտանում ամբողջությամբ ավարտվել են ոռոգման ջրագծի կառուցման և ջրամբարների կառուցման աշխատանքները, և ջուրն արդեն հասնում է գյուղացուն։
Բնակիչները բարձրացրել են նաև բազմաբնակարան շենքերի տանիքների վերանորոգման հարցը։ Համայնքապետը վստահեցրել է, որ առաջիկայում կմեկնարկի տանիքների փոխարինման և մանսարդային հարկերի կառուցման նոր ծրագիր։ Այս նախաձեռնությունը ոչ միայն կլուծի տանիքների հիմնախնդիրը, այլև կստեղծի լրացուցիչ բնակելի տարածքներ։ Այսօր քաղաքաշինության բաժնին հանձնարարվել է պատրաստել նախահաշվային առաջադրանքները։
Որոտանի ֆերմերները համայնքապետին խնդրել են այս տարի ևս լուծել անասնակերի հարցը և տրամադրել 5000 տուկ խոտ։ Առուշանյանը խոստացել է, որ այս ուղղությամբ ևս աշխատանքներ կտարվեն՝ աջակցելով համայնքի գյուղատնտեսության զարգացմանը։
Համայնքապետի հանձնարարականով՝ Որոտան, Շուռնուխ և Բարձրավան բնակավայրերում կիրականացվի կանոնավոր աղբահանություն՝ ապահովելով մաքուր միջավայր։
Շուռնուխում բնակիչները համայնքապետից խնդրել են լուծել բնակավայրի բուժքրոջ հաստիքի հարցը և աջակցել, որպեսզի բժշկական ծառայություններ ստանան ոչ թե Կապանի, այլ Գորիսի ԲԿ-ում՝ հաշվի առնելով, որ համայնքը Շուռնուխից Գորիս անվճար հասարակական տրանսպորտ է տրամադրում։ Սա էականորեն կբարելավի բնակիչների առողջապահական ծառայությունների հասանելիությունը։ Նաև դիմել են Զարգացման կենտրոնը գործարկելու խնդրանքով։ Համայնքապետը վստահեցրել է, որ այդ հարցը ևս կլուծվի։
Բարձրավանում ընթացքի մեջ է վարչական շենքի նորոգումը, որտեղ տեղակայված են մանկական զարգացման կենտրոնը և բուժկետը։ Այս նորոգումը կապահովի ավելի հարմարավետ և արդիական պայմաններ համայնքի կարևորագույն ծառայությունների համար։ Համայնքապետը ծանոթացել է դեպի այգիներ տանող 6 կմ նոր կառուցվող ճանապարհի աշխատանքներին, ինչպես նաև նորակառույց կապտաժին։ Այս աշխատանքները կնպաստեն համայնքի ենթակառուցվածքների զարգացմանը և բնակիչների կյանքի որակի բարելավմանը։
