Ռազմավարական նշանակության ջրամբար Ակներ և Վերիշեն բնակավայրերի համար
Այսօր Ակներ և Վերիշեն բնակավայրերի համար կարևոր քայլ կատարվեց ջրային ռեսուրսների կառավարման բարելավման տեսանկյունից: Համայնքի ղեկավար Առուշ Առուշանյանի և UNDP կազմակերպության ներկայացուցիչների մասնակցությամբ տեղի ունեցավ այց դեպի այն տարածք, որտեղ նախատեսվում է կառուցել 10000 խորանարդ մետր տարողությամբ ջրամբար:
Նախագծման աշխատանքներն արդեն մեկնարկել են։ Այս ռազմավարական նախաձեռնությունը հատկապես կարևորվում է ջրային պաշարների արդյունավետ բաշխման տեսանկյունից: Կառուցվող ջրամբարի ջրային պաշարների 70%-ն ուղղվելու է Ակների դաշտերը ոռոգելի դարձնելուն, մասնավորապես գետի ձախակողմյան հատվածի՝ մինչ այժմ ջրազուրկ տարածքներում գյուղատնտեսության զարգացման համար:
Մնացած 30%-ը հնարավորություն կստեղծի Վերիշենի համայնքի ջրամատակարարման և ոռոգման կարիքները բավարարելու համար: Ջրամբարի կառուցման և ջրագծերի վերակառուցման արդյունքում զգալիորեն կբարելավվի երկու բնակավայրերի բնակիչների կենսապայմանները և գյուղատնտեսական հողերի արդյունավետությունը:
Համայնքը չի սահմանափակվելու գործընկերների հետ միայն ջրամբարի կառուցմամբ: Առաջիկայում նախատեսվում է նաև Ակների և Վերիշենի ջրագծերի վերակառուցման աշխատանքների իրականացում: Արդեն իսկ Վերիշենի ջրագծի վերակառուցման աշխատանքներն ընթացքի մեջ են՝ ՄԱԿ-ի Պարենի ծրագրի աջակցությամբ: Ակների ջրագծի վերակառուցման աշխատանքները նույնպես շուտով կմեկնարկեն:
