Արևմտյան լրատվամիջոցների հաղորդմամբ՝ Իրանը փորձում է վերարտադրել ամերիկյան զինտեխնիկան՝ կիրառելով հակադարձ ինժեներիա։ Սա վկայում է, որ հակամարտությունը դուրս է գալիս դասական ռազմական շրջանակներից և ընդգրկում նոր՝ տեխնոլոգիական ոլորտներ։
Տեղ համայնքի ղեկավար Դավիթ Ղուլունցը աշխատանքային այցով եղել է Խնածախ, Քարաշեն, Վաղատուր և Խոզնավար բնակավայրերի նախակրթարաններում։ Ուսումնասիրվել են պայմաններն ու խնդիրները, տրվել են հանձնարարականներ՝ դրանց արագ լուծման համար։
Ապրիլի 24-ին «Ուիգմոր» կանանց և երեխաների հիվանդանոցի մասնագետների թիմը այցելել է Գորիսի բժշկական կենտրոն՝ իրականացնելու երեխաների անվճար խորհրդատվություն և բուժզննում։ Այցի ընթացքում մանկական էնդոկրինոլոգը, նյարդաբանը, ուրոլոգ-վիրաբույժը, մաշկաբանը և մանկական քիթ-կոկորդ-ականջաբանը համատեղ իրականացրել են ընդունելություն, որի արդյունքում հետազոտվել է շուրջ 220 երեխա։ Նախաձեռնությունը միտված էր բարձրացնելու երեխաների առողջապահական ծառայությունների հասանելիությունը և ապահովելու մասնագիտական աջակցություն մարզային բնակչությանը։
Ապրիլի 29-ից մինչև մայիսի 3-ը Գորիս քաղաքում կանցկացվի հանրապետական նկարչական սիմպոզիում՝ «Բակունցյան Կյորես» խորագրով։ Նախաձեռնությունը կազմակերպվում է Ակսել Բակունց գիտամշակութային հիմնադրամ-ի, ՀՀ Նկարիչների միության Սյունիքի մասնաճյուղի և Ակսել Բակունցի տուն-թանգարանի համագործակցությամբ։ Ծրագրի նպատակն է վերաիմաստավորել Բակունցյան բնաշխարհը ժամանակակից կերպարվեստի լեզվով և զարգացնել Գորիսը որպես ստեղծագործական ակտիվ մշակութային կենտրոն։