Սիրելի հայրենակիցներ,

Մեր երկրի և ժողովրդի դեմ հոգևոր վայրագ հարձակումները շարունակվում են: «Տոմսարկղ» էջից տեղեկանում ենք, որ դեկտեմբերի 14-ին` կիրակի` Տիրոջ Հարության օրը, ֆիննական սատանիստական խումբ «Azaghal»-ը հանդես է գալու Հայաստանում խավարային ծեսով` Tonelab Studios-ում: Հայտարարության մեջ բառացի նշված է, որ խումբը հագեցած է անզուսպ և միստիկ ատելությամբ և նրանք ուզում են Երևանը դարձնել խավարային ծեսի վկան:

Նրանց երգերում գերակշռում են խավարի, մահվան, հակամարդկային և օկուլտիստական թեմաները։ Սկավառակներից մեկը կոչվում է «սատանայի ստեղծածը», որում երգվում է դիվային, սատանայական ուժերի մասին: Մեկ այլ ալբոմի անունն է. «Ամեն կենդանի բան մեռնում է», որտեղ երգվում է կործանման, մահվան պաշտամունքի, մութ ծեսերի մասին։ Հաջորդ ալբոմը՝ «Դեպի խավար», ներկայանում է որպես խավարի ուժերի գերակայություն, չարի պաշտամունք։ Իսկ «Թույն» ալբոմը նսեմացման, չարիքի, կործանման, դժոխքի մութ էներգիայի մասին է: Մի խոսքով, ամբողջությամբ սատանայի, դևերի պաշտամունք, նրանց գովաբանություն, նվիրում, քրիստոնեական հավատքի և եկեղեցու քննադատություն, ավերում։

!!! Այսինքն, մեր սրբազան հողի վրա պատրաստվում է կատարվել մի սատանայական ծես, չարի պաշտամունք, դիվային շաբաշ, դժոխային խրախճանք:

Այս սատանիստական խումբը ինչու՞ է հիմա հրավիրվել Հայաստան: Հարց տվեք ինքներդ ձեզ ու մտածեք: Չէ՞ որ այս սատանիստները բացահայտորեն պաշտամունք են մատուցում խավարի իշխանին՝ սատանային և վիրավարում քրիստոնյաների կրոնական զգացմունքները:

Հոգևոր օրենքների անտեսումը բերում է ծանր հետևանքների: Հոգևոր սահմանների անկումը բերում է ֆիզիկական սահմանների անկման, կորուստների: Հոգևոր շնությունը, սրբապղծությունը, այլասերվածությունը բերում է պատուհասի, պատերազմի։

Սա չար ուժերի հրավեր է դեպի մեր Սրբազան Հայրենիք, սպառնալիք` մեր հոգևոր անվտանգությանը: Սա հարուցում է հանրության մտահոգ հատվածի արդար վրդովմունքը:

Բոլոր նրանք, ովքեր պատրաստվում են մասնակցել այդ «համերգին», պետք է հստակ գիտակցեն, որ այս դիվային շաբաշ կատարողին կամա թե ակամա հավանություն են տալիս: Եթե դու չարի հետ զվարճանում ես ու քո մտքում տեղ տալիս, դու դրանով ճանապարհ ես բացում դեպի քո սիրտը, որտեղ բույն դնելով պիղծ ոգիներն իրենց չար կամքն են թելադրելու քեզ։ Տեր Հիսուս Քրիստոս ասաց, որ այդպիսի մարդու վերջն ավելի վատ է լինելու քան սկիզբը (Մատթ․ 12։45):

Եթե դու չարին ներս ես թողնում, նա պատերազմ ու ողբ է բերելու քո կյանք, ու շատ դժվար է լինելու նրանից ազատվելը։ Դրա համար անհրաժեշտ է արգելես նրա մուտքը քո կյանքից ներս։ Հիշե՛ք․ «Ոչ ոք չի կարող երկու տիրոջ ծառայել. կա՛մ մէկին կ՚ատի եւ միւսին կը սիրի, կա՛մ մէկին կը մեծարի եւ միւսին կ՚արհամարհի» (Մատթ. 6:25)։

Մենք Տիրոջ ողորմածությամբ հանրային կեցվածքով կանխեցինք սատանիստ, սրբապիղծների՝ Մորգենշտեռնի, Պրուսիկինի, Բրեյխայի, Սևդալիզայի մուտքը մեր սրբազան հայրենիք:

«Հնազանդուեցէ՛ք ուրեմն Աստծուն եւ դիմադրեցէ՛ք սատանային, ու նա կը փախչի ձեզանից» (Յակ. 4:7):

Այս սատանիստների «խավարային ծեսը» եթե չչեղարկվի, մենք կառերեսվենք նոր պատուհասների հետ:

Տէ՛ր Հիսուս Քրիստո՛ս, խնդրում ենք, խափանի՛ր:

Խնդրում ենք տարածել ու իրազեկել բոլորին

ՍՐԲԱԶԱՆ ՀԱՅԱՍՏԱՆ ՆԱԽԱՁԵՌՆՈւԹՅՈւՆ