Այսօր՝ նոյեմբերի 12-ին, Գորիսը դարձավ շախմատային կենտրոն՝ հյուրընկալելով տարբեր երկրներից ժամանած շախմատիստների։
«Գորիս» հյուրանոցային համալիրում կայացավ Հայաստանի շախմատի ակադեմիայի և Սյունիքի շախմատի ֆեդերացիայի կողմից կազմակերպված «Գորիս Օփեն» շախմատի միջազգային մրցաշարի բացման արարողությունը։
Միջոցառմանը ներկա էին Գորիսի փոխհամայնքապետ Իրինա Յոլյանը, Հայաստանի շախմատի ակադեմիայի հիմնադիր-տնօրեն, միջազգային գրոսմայստեր Սմբատ Լպուտյանը և Սյունիքի շախմատի ֆեդերացիայի նախագահ Արթուր Խոջաբաղյանը։
Իրենց ողջույնի խոսքում նրանք ընդգծեցին նմանատիպ մրցաշարերի կարևոր դերը մարզական և կրթական զարգացման գործում՝ շեշտելով Գորիսի՝ որպես մշակութային և ինտելեկտուալ կենտրոնի նշանակությունը։
Առաջիկա օրերին սպասում են հետաքրքիր պարտիաներ, նոր ծանոթություններ և հիշարժան պահեր։
Հաջողություն ենք մաղթում բոլոր մասնակիցներին:
