Գորիս. Փրկարարական օր՝ դպրոցականների աչքերով

Այսօր Սյունիքի մարզային փրկարարական վարչության Գորիսի ջոկատը հյուրընկալեց Գորիսի Ֆրանկոֆոն դպրոցի, Կարմիր խաչի կամավորական խմբի, ինչպես նաև «Իրական» և մի շարք այլ դպրոցների աշակերտների։ Ճանաչողական այցի նպատակն էր երեխաներին ծանոթացնել փրկարար ծառայության աշխատանքներին և անվտանգության կարևոր կանոններին։

Գորիսի ջոկատի հրամանատար Անդրանիկ Սահակյանը աշակերտներին ներկայացրեց հրդեհներից և այլ արտակարգ իրավիճակներից պաշտպանվելու հիմնական կանոնները, շեշտեց զգոնության և արագ արձագանքի անհրաժեշտությունը։

Այնուհետև փրկարարները կազմակերպեցին գործնական ցուցադրություն․ նրանք ցուցադրեցին, թե ինչպես են հրդեհի մասին ահազանգ ստանալուց անմիջապես հետո դուրս գալիս դեպքի վայր, ինչ գործողություններ են կատարում ճանապարհին և ինչպես են իրականացնում հրդեհաշիջման աշխատանքները։

Միջոցառումն ուղեկցվեց հարց ու պատասխանով, որի ընթացքում երեխաները հնարավորություն ունեցան իրենց հուզող հարցերը ուղղել փրկարարներին և ավելի մոտիկից ծանոթանալ նրանց գործին։

Լրագրող`Armine Simonyan