Գորիսի համայնքապետարանը տեղեկացնում է, որ համայնքի աղբավայրում անփութության հետևանքով բռնկված հրդեհի մարման աշխատանքները շարունակվում են։
Շուրջ երկու օր տևած լարված աշխատանքի արդյունքում հաջողվել է կրակի հիմնական օջախները մեկուսացնել և կանխել դրա հետագա տարածումը։
Ահազանգը ստանալուց անմիջապես հետո համայնքապետարանի կողմից տեղում մոբիլիզացվել են բոլոր հնարավոր ռեսուրսները՝ հրդեհաշիջման աշխատանքներն արդյունավետ կազմակերպելու համար։
Գործընթացին ներգրավվել են ինչպես համայնքային ստորաբաժանումները, այնպես էլ հրշեջ-փրկարարական ջոկատները։
Աշխատանքներին իրենց աջակցությունն են ցուցաբերել նաև համայնքի շինարարական և այլ մասնավոր կազմակերպություններ՝ տրամադրելով անհրաժեշտ հատուկ տեխնիկա և ռեսուրսներ։
Գորիսի համայնքապետարանը խորին շնորհակալություն է հայտնում բոլոր այն կառույցներին և անհատներին, ովքեր այս պահին ներգրավված են հրդեհաշիջման աշխատանքներում։
Միևնույն ժամանակ, հորդորում ենք մեր բոլոր համաքաղաքացիներին լինել առավել զգոն, պահպանել հրդեհային անվտանգության կանոնները՝ նման դեպքերը հետագայում բացառելու նպատակով։
