Ադրբեջանական պաշտոնական լրահոսը (APA.az) հայտնում է Նախիջևանի Ինքնավար Հանրապետության Սահմանադրության սպասվող արմատական վերափոխումների մասին։ Նոր նախագծով նախատեսվում է նախաբանից հեռացնել 1921 թվականի Մոսկվայի և Կարսի պայմանագրերի հիշատակումները՝ փոխարենը ամրագրելով, որ երկրամասը Ադրբեջանի «անբաժանելի մասն է»։
Այս քայլը ոչ թե ինքնավստահության, այլ իրավական տագնապի նշան է։ Բաքուն գիտակցում է, որ Կարսի պայմանագիրը Հայաստանի ձեռքին «իրավական կեռիկ» է. այնտեղ ամրագրված է, որ Նախիջևանը հանձնվում է Ադրբեջանի խնամակալությանը, այլ ոչ թե սեփականությանը։ Հեռացնելով այդ հղումները՝ Ադրբեջանը փորձում է միակողմանիորեն փոխել միջազգային կարգավիճակը՝ վերածելով այն սովորական վարչական միավորի։
Իսկ ո՞րը կլինի Ռուսաստանի արձագանքը։
Մոսկվան, լինելով 1921 թ. պայմանագրերի գլխավոր ճարտարապետը և երաշխավորը, հայտնվելու է հետաքրքիր երկընտրանքի առջև. Եթե Բաքվի այս քայլը համաձայնեցված է Մոսկվայի հետ, ապա Ռուսաստանը կարող է «չնկատել» փոփոխությունը՝ փոխարենը ստանալով լիակատար վերահսկողություն ապագա տրանսպորտային ուղիների (միջանցքների) նկատմամբ։ Ռուսաստանը կարող է օգտագործել սա որպես ճնշման միջոց Բաքվի վրա՝ հիշեցնելով, որ առանց Կարսի պայմանագրի՝ Նախիջևանի ներկայիս սահմանները դառնում են իրավականորեն խոցելի։ Սակայն Մոսկվան դժվար թե հեշտությամբ հրաժարվի մի փաստաթղթից, որը իրեն տարածաշրջանում «գերագույն դատավորի» կարգավիճակ է տալիս։ Ռուսաստանը ստիպված կլինի հաշվի նստել Անկարայի հետ, քանի որ Կարսի պայմանագիրը նաև ռուս-թուրքական հավասարակշռության հիմքն է։