Գորիս համայնքում սոցիալական բնակարանային շենքերի վերակառուցման աշխատանքներն ավարտին են մոտենում։
Ծրագրի շրջանակներում 18 ընտանիք շուտով կունենա հարմարավետ և ժամանակակից բնակարաններ։ Սա քայլ է դեպի համայնքի բնակֆոնդի բարելավում և սոցիալապես խոցելի ընտանիքների կենսապայմանների արմատական փոփոխություն։
Սեփական տուն ունենալը յուրաքանչյուր ընտանիքի երազանքն է ։ Այս ծրագիրը ոչ միայն բնակարանային խնդրի լուծում է, այլև հնարավորություն՝ ընտանիքներին վերագտնելու կայունությունը, ապահովության զգացումը և ապագայի հանդեպ վստահությունը։
Բնակարանային ապահովության հարցը գտնվում է համայնքի ղեկավարության հատուկ ուշադրության ներքո։ Համայնքը հետևողականորեն շարունակելու է աշխատել նոր բնակարանաշինական ծրագրերի ներդրման ուղղությամբ։ Առաջնահերթությունը տրվելու է սոցիալապես առավել խոցելի խմբերին, երիտասարդ ընտանիքներին և հատուկ կարիքներ ունեցող անձանց։
Ծրագրի նպատակն է ոչ միայն բնակարաններ տրամադրել, այլև ստեղծել կայուն հիմք ընտանիքների զարգացման համար։ Սեփական տունը դառնում է այն հենակետը, որտեղից սկսվում է յուրաքանչյուր ընտանիքի առաջընթացը, երեխաների կրթությունը և ապագայի կերտումը։
Բնակարանաշինության ծրագրի իրականացման համար ֆինանսական օժանդակություն է ցուցաբերել UNDP in Armenia, ՄԱԶԾ կայուն համայքներ ծրագիրը:
