Արարատ Միրզոյանը ելույթ է ունեցել Միջազգային քրեական դատարանի Հռոմի կանոնադրության մասնակից պետությունների վեհաժողովի 23-րդ նստաշրջանին, ընդ որում՝ առաջին անգամ՝ ՀՀ-ի կողմից Հռոմի կանոնադրությունը վավերացնելուց հետո։
Ելույթը, կարելի է ասել, մեզ ուղղակիորեն վերաբերող ոչնչի մասին էր։ Այնտեղ ո՛չ Հայոց ցեղասպանության մասին կար մեկ բառ անգամ հիշատակում, ո՛չ էլ մեկ տարի առաջ հարյուր հազարից ավելի արցախցիների բնաջնջման սպառնալիքի ներքո բռնագաղթի ենթարկելու Ադրբեջանի ցեղասպան գործողությունների մասին։
Հիշեցնենք, որ Հռոմի կանոնադրությունը վավերացնելու ժամանակ բարձրագոչ հայտարարում էին, թե դրանով պատասխանատվության են հրավիրելու Ադրբեջանի պաշտոնատար ու զինվորական անձանց, ովքեր կատարել են մարդկության դեմ ուղղված, ցեղասպանության և պատերազմական հանցագործություններ։ Վավերացումը տեղի ունեցավ 2023-ի հոկտեմբերի 3-ին, որից հետո և մինչ օրս Հայաստանի կողմից ՄՔԴ դիմելու որևէ դեպքի մասին անձամբ տեղյակ չեմ։ Դե իսկ հայ-ադրբեջանական բարձրաստիճան պաշտոնատար անձանց շփումների ջերմությունը, ինչպես, օրինակ՝ Կազանում այս տարվա հոկտեմբերին տեղի ունեցածն էր, ուղիղ հակառակի վկայությունն է․․․մեղմ ասած։
