ԱՇՆԱՆ ՀՐԱՇԱԼԻ ԳՈՒՅՆԵՐԸ ԳՈՐԻՍԻ ՄԱՆԿԱՊԱՐՏԵԶՆԵՐՈՒՄ
Գորիս համայնքի մանկապարտեզներում նշվեց աշնան ավանդական տոնը՝ լի գույներով, երաժշտությամբ և մանկական անմիջականությամբ։
Փոքրիկները հանդես եկան գեղեցիկ ներկայացումներով, երգերով ու պարերով՝ արտահայտելով իրենց հիացմունքը աշնանային բնության հանդեպ։ Նրանք արտասանեցին բանաստեղծություններ աշնան մասին, պատմեցին հեքիաթներ բերքի ու բարիքի վերաբերյալ, ներկայացրին աշնանային բնության գեղեցկությունը մանկական անկեղծությամբ և ջերմությամբ։
Միջոցառման կարևորագույն նպատակն էր զարգացնել երեխաների աշխարհաճանաչողությունը և գեղագիտական ընկալումները։ Տոնի միջոցով մանկավարժները կարողացան երեխաներին սովորեցնել աշնան բնորոշ հատկանիշները, բնության փոփոխությունները և դրանց նշանակությունը։
Նման միջոցառումները նպաստում են երեխաների ստեղծագործական մտածողության զարգացմանը, թիմային աշխատանքի հմտությունների ձևավորմանը և, որ ամենակարևորն է, սերմանում են սեր ու հոգատարություն բնության նկատմամբ։ Սա հատկապես կարևոր է վաղ տարիքից բնապահպանական դաստիարակության տեսանկյունից։
