Սիրելի հավատավոր ազգակիցներ,

Գոհությամբ առ Ամենախնամ Աստված հայտնում եմ ձեզ ամենքիդ, որ վաղը՝ նոյեմբերի 3-ին, Ն.Ս.Օ.Տ.Տ. Գարեգին Բ. Ամենայն Հայոց Վեհափառ Հայրապետի ձեռնադրության և օծման՝ գահակալության 25-րդ տարեդարձն է:

Հայոց Եկեղեցու առաքելական Սբ Աթոռի 132-րդ ազգընտիր Գահակալը, հիրավի, մեծագործ Հայրապետ է, մեր Սբ Եկեղեցու անձնդիր Հովվապետերից է, Ով Իր Հայրապետությունն սկսեց մեր ազգի, պետության և Եկեղեցու ծանր ու դժվարին շրջանում:

25 տարի Հայոց Հայրապետն իրեն հատուկ խորագիտությամբ, նախանձախնդրությամբ և հետևողականությամբ ամրացրեց, ընդարձակեց ու զորեղացրեց Հայոց եկեղեցական կյանքն ու շինվածքը:

Հայոց Հայրապետը 25 տարի տքնեց ու մաքառեց, որպեսզի Եկեղեցին Հայկական անշեղ ու անվնաս հառաջանա իր սուրբ ճանապարհով: Եվ, այժմ, երբ հայացք ենք ձգում անցյալ տարիներին՝ լույսի պես ակնհայտ է Ամենախնամ Աստծո ամենազոր ու պահապան Աջի հովանին ու ներգործությունը 132-րդ Հայոց Կաթողիկոսի կյանքում և գործունեության ողջ ընթացքին:

Տեր Աստված միշտ զորակից ու պահապան է եղել Իր հավատարիմ Տնտեսին, Իր օծյալ Հայրապետին:

25 տարվա իրագործումները բազում են, ամենուր են և ամեն արդար ու ազնիվ ու բարի սիրտ ու բերան այդ ամենի մասին վկայում ու բարձրաձայնում է: Եվ թագն ու պսակը Հայրապետական մեծ իրագործումների՝ Սբ Էջմիածնի Մայր Տաճարի համակողմանի հիմնարար վերանորոգումն է:

Մաղթենք, սիրելիներ, ամենքս մեր սրտի տաճարում և աղոթք մատուցենք մեր Տեր Աստծուն, որ Արարիչն Ամենակալ երկար-երկար կյանք, առավել զորություն և կարողություն պարգևի մեր Շնորհազարդ Հայրապետին, Նրա աստվածընտրյալ Անձի միջոցով՝ խաղաղ ու անվրդով շարունակի առաջնորդել հայ քրիստոնյաներիս, քանզի Հայոց պատմության այս ծանր փուլում մենք կարիք ունենք հենց Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի իմաստությանը և օրինակին:

Լի սրտով և անձիս ողջ գիտակցությամբ առ ի վկայություն ամենքի արձանագրում եմ, որ երջանիկ եմ լինել Հայոց Հայրապետի հոգևոր զավակը, խոնարհ ծառայակիցը և Նրա տեսիլքի ու պատգամի յուրովսանն իրագործողներից մեկը:

Լուսանկարը՝ Զավեն Խաչիկյանի