Գորիս համայնքի ղեկավար Առուշ Առուշանյանի շնորհավորական ուղերձը Անկախության տոնի կապակցությամբ։
Սիրելի հայրենակիցներ,
Այսօր մենք նշում ենք մեր անկախության տոնը՝ մի օր, որը խորհրդանշում է մեր ժողովրդի անկոտրում կամքն ու ազատության ձգտումը: Սակայն անկախությունը միայն հռչակագրով չի սահմանափակվում. այն ամենօրյա նվիրում և աշխատանք է պահանջում մեզնից յուրաքանչյուրից:
Մեր անկախությունն ամրապնդելու համար մենք պետք է գործով ապացուցենք մեր նվիրվածությունը հայրենիքին: Դա նշանակում է՝ պահպանել մեր հավատքը, ինքնությունը, մշակույթը և ամուր պահել մեր արմատները: Մեր պատմությունն ու ավանդույթները մեր ուժի աղբյուրն են, և դրանք պետք է փոխանցենք գալիք սերունդներին:
Անկախ պետության հարատևությունը կախված է մեր ամենօրյա ջանքերից: Գիշեր ու ցերեկ, արդար աշխատանքով, մենք կերտում ենք մեր երկրի ապագան: Յուրաքանչյուր ուսուցիչ, որ կրթում է մեր երեխաներին, յուրաքանչյուր գյուղացի, որ մշակում է հողը, յուրաքանչյուր ձեռներեց, որ նոր աշխատատեղեր է ստեղծում, նպաստում է մեր պետականության ամրապնդմանը:
Թող այս տոնը լինի վճռականության օր: Վճռականություն՝ կառուցելու այնպիսի Հայաստան, որը կլինի արդար և ապահով: Վճռականություն՝ լինելու արժանի մեր նախնիների զոհաբերության և մեր երեխաների երազանքների:
Թող մեր անկախությունը լինի ոչ միայն անցյալի ձեռքբերում, այլ ապագայի խոստում:
Կեցցե՛ ազատ և անկախ Հայաստանը: Կեցցե՛ հայ ժողովուրդը:
