Մարտի 5-ին, Թուրքիայի արևմուտքում գտնվող Բուրսա քաղաքում «Բուրսասփոր»-«Ամեդսփոր» (Դիարբեքիրը ներկայացնող թիմ, որտեղ բնակչության մեծամասնությունը քրդեր են) ֆուտբոլային խաղի ժամանակ «Բուրսասփոր»-ի երկրպագուները անկարգություններ են կազմակերպել։
Երբ «Ամեդսփորի» խաղացողները դուրս են եկել խաղադաշտ, «Բուրսասփորի» երկրպագուները մի շարք ազգայնամոլական կարգախոսներ են վանկարկել, ինչպես՝ «Հայրենիքն անբաժանելի է», «Երջանիկ է նա, ով ասում է՝ թուրք եմ», «Ջախջախի՛ր նրան, ով կհամարձակվի նայել քո հայրենիքին, որդի՛ս», «Վրեժ»։
Այնուհետև «Ամեդսփորի» ֆուտբոլիստների վրա սկսել են տարբեր առարկաներ նետել, այդ թվում՝ պայթուցիկ նյութեր։ Թիմի դարպասապահը վնասվածք է ստացել։
Իսկ խաղի ընթացքում «Բուրսասփորի» երկրպագուները Մահմութ Յըլդըրըմի պատկերով (թուրքական հետախուզության գաղտնի գործակալ, ակտիվորեն պայքարում էր Քրդստանի աշխատավորական կուսակցության դեմ) պաստառներ են բարձրացրել։
