Տեղ համայնքի ղեկավար Դավիթ Ղուլունցը հանդիպել է ՀՀ ՆԳՆ փրկարար ծառայության Սյունիքի մարզային փրկարարական վարչության պետ Դավիթ Հովհաննիսյանի հետ։
Հանդիպման ընթացքում քննարկվել են Տեղ համայնքի տարածքում հրդեհային անվտանգության ապահովման, հրդեհների կանխարգելման և արտակարգ իրավիճակներին արդյունավետ արձագանքմանն առնչվող մի շարք կարևոր հարցեր։
Դավիթ Ղուլունցը և Դավիթ Հովհաննիսյանը կարևորել են ամառային հրդեհավտանգ ժամանակահատվածում խոտածածկ և գյուղատնտեսական նշանակության տարածքներում կանխարգելիչ միջոցառումների ուժեղացումը, բնակչության իրազեկվածության բարձրացումը, ինչպես նաև համայնքային և փրկարար ծառայությունների միջև սերտ ու արդյունավետ համագործակցությունը։
Ընդգծվել է, որ հրդեհների կանխարգելումը պահանջում է պետական և տեղական ինքնակառավարման մարմինների, ինչպես նաև համայնքի բնակիչների համատեղ և պատասխանատու աշխատանքը։
Կողմերը պայմանավորվածություն են ձեռք բերել հրդեհավտանգ ամիսներին Տեղ համայնքի բնակավայրերում համատեղ իրականացնել իրազեկման և կանխարգելիչ միջոցառումներ՝ բնակիչներին ներկայացնելով հրդեհային անվտանգության կանոնները, արտակարգ իրավիճակներում ճիշտ վարքագծի սկզբունքները և հնարավոր ռիսկերի նվազեցման ուղիները։
Տեղ համայնքապետարանը կոչ է անում համայնքի բոլոր բնակիչներին պահպանել հրդեհային անվտանգության կանոնները, խուսափել բաց տարածքներում կրակի օգտագործումից, լինել զգոն և պատասխանատու՝ նպաստելով համայնքի, բնակիչների և շրջակա բնության անվտանգության պահպանմանը։
