ԴԱՍԸՆԹԱՑ ԳՊՀ-ՈՒՄ
Մայիսի 7-ին Գորիսի պետական համալսարանը հյուրընկալեց Ավանդների հատուցումը երաշխավորող հիմնադրամի ներկայացուցիչներին՝ տնօրեն Հերմինե Հարությունյանի գլխավորությամբ։
Ավանդների հատուցումը երաշխավորող հիմնադրամի նպատակն է ՀՀ բանկային համակարգի կայունության և հուսալիության ապահովումը՝ ֆիզիկական անձանց և անհատ ձեռնարկատերերի բանկային ավանդների հատուցումը երաշխավորելու միջոցով:
Հանդիպման նպատակն էր բարձրացնել երիտասարդների ֆինանսական գրագիտության մակարդակը և ձևավորել պատասխանատու ֆինանսական վարքագիծ։
Դասընթացի ընթացքում մասնակիցները ծանոթացան անձնական ֆինանսների արդյունավետ կառավարման, խնայողությունների ձևավորման հմտություններին:
Աշխատակիցներն անդրադարձան Ավանդների հատուցումը երաշխավորող հիմնադրամի գործունեությանը, դրա դերակատարությանը ֆինանսական համակարգում և հիմնական գործառույթներին:
Դասընթացի շրջանակում մասնակիցները տեղեկացան նաև ՀՀ-ում պարտատոմսերի շուկայի առանձնահատկություններին, ֆիզիկական անձանց կողմից պարտատոմսերում ներդրումներ կատարելու մեխանիզմներին և դրանց առավելություններին։
Հանդիպումն անցավ ակտիվ քննարկումների և հարցուպատասխանի ձևաչափով՝ նպաստելով ուսանողների ֆինանսական գիտելիքների խորացմանն ու գործնական հմտությունների զարգացմանը։
