Գորիս համայնքի ղեկավար Առուշ Առուշանյանի շնորհավորական ուղերձը Աշխատանքի և աշխատավորի օրվա կապակցությամբ
Հարգելի՛ հայրենակիցներ,
Շնորհավորում եմ բոլորիս մայիսի 1-ի՝ Աշխատանքի և աշխատավորների օրվա կապակցությամբ։
Այս օրը ևս մեկ անգամ հիշեցնում է, որ մեր պետության ներկան և ապագան կառուցվում են աշխատող, արարող ու ստեղծագործ մարդկանց ամենօրյա նվիրումով։
Յուրաքանչյուր բնագավառի ներկայացուցիչ՝ բանվորից մինչև գիտնական, ուսուցչից մինչև գյուղատնտես, իր կարևոր ու անփոխարինելի ներդրումն ունի մեր երկրի զարգացման, շենացման և հզորացման գործում։
Արժանի է խորին հարգանքի յուրաքանչյուր աշխատանք, որի հիմքում հայրենիքի հանդեպ պատասխանատվությունն է, երկրի առաջընթացն ու գալիք սերունդների բարեկեցիկ ապագան։ Մեր ընդհանուր հաջողություններն ու ձեռքբերումները ծնվում են յուրաքանչյուրիս պատասխանատու և նվիրված աշխատանքից։
Առանձնահատուկ ցանկանում եմ ընդգծել մեր այն հայրենակիցների աշխատանքը, ովքեր սահմանամերձ բնակավայրերում, հաճախ բարդ ու դժվարին պայմաններում, շարունակում են մշակել հողը, արարել ու ապրել իրենց հայրենի հողում։ Սահմանին ապրող և աշխատող մարդը ոչ միայն հաց ու բարիք ստեղծող է, այլև իր ամենօրյա աշխատանքով ամուր պահող ու պաշտպանող հայրենի հողի պահապան։
Միայն միասնականությամբ, փոխադարձ աջակցությամբ և միմյանց աշխատանքի հանդեպ հարգանքով կարող ենք հաղթահարել բոլոր մարտահրավերներն ու կառուցել ուժեղ, զարգացող և արժանապատիվ հայրենիք։
Թող ամեն բացվող օրը բոլորիս լցնի նոր ուժով, եռանդով և հավատով՝ շարունակելու աշխատել հանուն մեր համայնքների, մեր ժողովրդի և մեր հայրենիքի բարօրության։
Մաղթում եմ խաղաղ երկինք, արդյունավետ ու ստեղծարար աշխատանք, նոր ձեռքբերումներ և սեփական ձեռքերով ստեղծած արդյունքով հպարտանալու բազում առիթներ։
