Նոր մոտեցմամբ ու նոր ստեղծագործություններով «Կաթիլ» հայկական ինդի-ֆոլկ խումբը ներկայացնում է իր նոր ձայնասկավառակը, որը հավակնում է սիրելի դառնալ ոչ միայն հայ, այլեւ արտասահմանցի երաժշտասերների համար՝ ուղի հարթելով դեպի միջազգային բեմեր։ «Ակներ»՝ այսպես է կոչվում «Կաթիլ»-ի նոր ալբոմը, որի շնորհանդեսը յուրօրինակ միջավայրում էր՝ Հանրային ռադիոյի նորաբաց ձայնագրման ստուդիայում: BRAVO.am-ը լուսանկարել է միջոցառումը եւ զրուցել բենդի անդամների հետ։
2019 թվականին թողարկված «Կուզիմ» երգով հայտնի դարձած խումբը, որ այնուհետեւ շարունակում էր հայկական տարբեր շրջանների ֆոլկ երգերի մշակումներով հանդես գալ, այժմ արդեն փորձում է հեղինակային գործեր ներկայացնել։ Նոր ալբոմում ընդգրկված յոթ երգերից երեքը, օրինակ, հեղինակային ստեղծագործություններ են, իսկ մյուս չորսը՝ ֆոլկ մշակումներ։ Առաջիկայում բոլոր այդ երգերը ներկայացված կլինեն երաժշտական օնլայն հարթակներում, իսկ մինչ այդ ձայնասկավառակը թողարկվել է սահմանափակ քանակությամբ՝ հարյուր օրինակով։
Հայաստանի տարբեր շրջաններից եկած ու Երեւանում միմյանց հանդիպած երաժիշտները՝ Սեւադա Համբարչյանը (վոկալ, կիթառ), Արեգ Սուքիասյանը (կիթառ), Գրիգոր Քարտաշյանը (հայկական փողային գործիքներ), Գրիգոր Դավթյանը (հարվածային գործիքներ) եւ Ռոբերտ Սիմոնյանը (բաս կիթառ), ասում են, որ իրենց ճանապարհի 3 տոկոսն են համարում անցած, իսկ մնացած 97-ը դեռ պիտի անցնեն։ Խոստովանում են՝ սկզբում, երբ դեռ նոր էր ձեւավորվում խումբը, միմյանց հետ նվագելիս զգում էին, որ հետաքրքիր է ստացվում, բայց այժմ իրենց համատեղ աշխատանքում նոր շերտեր են բացահայտում, հասկանում են՝ իրենց երաժշտությունը բնավորության պես է դարձել։
Գրիգոր Քարտաշյանը մեր զրույցում պատմում է, որ «Ակներ» ալբոմի աշխատանքները նախորդ տարի էին սկսվել, երբ երկրում կորոնավիրուսի համավարակով պայմանավորված սահմանափակումներ էին․«Երբ հասկացանք, որ էլ չենք կարող նվագել, համերգներով հանդես գալ, որոշեցինք վերջապես ալբոմ ձայնագրել։ Մեզ այդ հարցում օգնեց «Բարեպաշտ սերունդ» հիմնադրամը, որը ֆինանսավորեց ձայնագրման աշխատանքները, ինչպես նաեւ օգնեցին մեր ընկերները՝ Հայկ Պիջոյանը եւ Արթուր Եղիազարյանը։ Մեր նախորդ գործերի նման հայկական տարբեր շրջանների երգ-երաժշտության գույները կան, սակայն մեր հեղինակային ոճով եւ ստեղծագործություններով»։
