«Ոչ բոլորը կդառնան շախմատիստ, բայց ոչ ոք չի ափսոսա այն ժամանակը, որը տվել է շախմատին». ասում էր մեծանուն հայ շախմատիստ Տիգրան Պետրոսյանը:
Տիգրան Պետրոսյանը շախմատային լեգենդ է, ով կանգնած է հայկական շախմատային փառահեղ պատմության ակունքներում:
Իր պաշտպանական փայլուն տակտիկայի, դիրքերը պահելու անսովոր կարողության համար ստացել է Երկաթե Տիգրան մականունը:
Հանդիսանում է ԽՍՀՄ քառակի, Եվրոպայի թիմային առաջնությունների ութակի եւ համաշխարհային օլիմպիադաների 9-ակի չեմպիոն: Աննկարագրելի տաղանդավոր ու համեստ մարդը ծնվել է Թբիլիսիում, ունեցել է դժվար մանկություն, բայց շախմատի հանդեպ սերը լուսավոր թելի պես միշտ ուղեկցել է իրեն:
Իր հաջողությունները նա մեծապես կապում էր հայ ժողովրդի անվերապահ աջակցության հետ: Երբ 1963 թվականին Բոտվիննիկի նկատմամբ տարած հաղթանակով նա առաջին անգամ հռչակվեց աշխարհի չեմպիոն՝ հայերը Մոսկվայում քոչարի էին պարում, հարուցելով անցորդների զարմանքը, ովքեր կարծում էին թե մի նոր մարդ է թռել տիեզերք: Տիգրան Պետրոսյանը հայ ժողովրդի արժանի զավակն է, ում անունը ոսկե տառերով է գրված հայկական շախմատի պատմության էջերում:
