Տեղի ունեցավ Գորիս համայնքի ավագանու հերթական նիստը, որը վարում էր համայնքի ղեկավար Առուշ Առուշանյանը:
Նիստի օրակարգում ընդգրկված էին 17 հարցեր, որոնք հիմնականում վերաբերում էին համայնքային սեփականություն հանդիսացող հողատարածքների և գույքի օտարմանը, նպատակային նշանակության փոփոխությանը, կառուցապատման իրավունքի տրամադրմանը և միջազգային ծրագրերին մասնակցելուն:
Օրակարգի կարևորագույն հարցերից էին Գերմանական միջազգային համագործակցության ընկերության կողմից հայտարարված տեղական զարգացման հիմնադրամի շրջանակներում դրամաշնորհային մրցույթին մասնակցելը և «Գործընկերություն հանուն Սյունիքի․ բարելավված համայնքային սոցիալական ծառայություններ» ծրագրի շրջանակում ենթադրամաշնորհային մրցույթին մասնակցության հարցերը: Նիստի ընթացքում նաև քննարկվեց «Արի Խնձորեսկ» տարածքային զարգացում հասարակական կազմակերպությանը անհատույց օգտագործման իրավունքով տարածք տրամադրելու հարցը:
Ավագանին հաստատեց նաև համայնքի սեփականության 2024 թվականի գույքագրման փաստաթղթերը և որոշում կայացրեց համայնքային սեփականություն հանդիսացող մի շարք ավտոմեքենաներ հրապարակային սակարկություններով օտարելու մասին:
Նիստի ավարտին ավագանին սահմանեց ութերորդ նստաշրջանի հերթական նիստի գումարման օրը:
