Յոթնաղբուրը Գորիսի զբոսայգում կանգնած հուշաղբյուր-հուշարձան է, նվիրված 1941–45 թթ. Հայրենական Մեծ պատերազմում զոհված գորիսեցիներին։ Հուշաղբյուրի դիմահայաց պատի աջ և ձախ կողմերում կան մեկական կամարակապ բացվածքներ, իսկ մեջտեղում՝ բացվածքների մեծությամբ, կամարակապ խորշ: Խորշի մեջ՝ տարբեր բարձրությունների վրա, տեղադրված են երեք ցայտաղբյուր:
Կենտրոնական խորշի աջ և ձախ կողմերում կան չափերով ավելի փոքր սյունազարդ երկու խորշեր, որոնցում տեղադրված է մեկական ցայտաղբյուր: Նմանատիպ երկու սյունազարդ խորշեր և մեկական կամարակապ բացվածքներ կան նաև կողային պատերին, իսկ կողային խորշերի մեջ կանգնեցված են մեկական ցայտաղբյուր: Ցայտաղբյուրների ընդհանուր թիվը յոթն է, և հենց դրա պատճառով է, որ գորիսեցիները այն անվանել են «Յոթնաղբյուր»: Հուշաղբյուրի աջ և ձախ թևերին հայերեն և ռուսերեն գրված է. «Կառուցվել է Հայրենական մեծ պատերազմի տարիներին` 1943-45թթ.», իսկ ճակատով մեկ գրված է. «Հիշատակ Հայրենական մեծ պատերազմում զոհված Զանգեզուրի հերոսներին»:
Դիմահայաց պատի հակառակ երեսին ագուցված գրանիտե սալիկի վրա կարդում ենք գուսան Աշոտի աղբյուր-հուշարձանին նվիրված երգից մի քառատող.
> Նրանց արդար հոգիներից
Բխում է պաղ, զուլալ աղբյուր,
Ամեն անգամ ջուր խմելիս
Շրթունքներով կտանք համբույր…
Հուշաղբյուրի հեղինակը՝ ճարտարապետ Ռաֆայել Իսրայելյանն է, իսկ կառուցումն իրականացրել է Նիկոլայ Մաթևոսյանը:
