2023 թվականի սեպտեմբերի 19-ին Ադրբեջանի՝ Արցախ ներխուժման ժամանակ Մարտունու քաղաքապետ 34-ամյա Ազնավուր Սաղյանը զոհվեց հայրենի քաղաքը ադրբեջանական հրետակոծությունից անձնվիրաբար պաշտպանելիս:
Նույն օրը առավոտյան լրագրողներից մեկի հետ կարճ զրույցում Սաղյանը ասել էր․ «Կռիվ ա, դե չեմ կարում խոսամ, լավ մնացեք»։ Կեսօրից հետո ևս մեկ անգամ կապ էր հաստատել և հայտնել վիրավորների մասին։
Սաղյանը ոչ միայն ղեկավար էր, այլև մարտիկ․ մասնակցել է 2020 թվականի 44-օրյա պատերազմին և արժանացել «Մարտական խաչ» առաջին աստիճանի շքանշանի։ Նրա նվիրվածությունը հստակ էր թե՛ գործում, թե՛ խոսքում։
Ազնավուր Սաղյանը հուղարկավորվել է «Եռաբլուր» զինվորական պանթեոնում։
Նրա վերջին գրառումն էր․
«Հավերժ կանգուն մնաս, ի՛մ Մարտունի…»
44-օրյա պատերազմի ժամանակ Ազնավուր Սաղյանի խոսքերից.
«Ինքնաթիռներն ու մնացածը, ինչ ունեին-չունեին, ամբողջությամբ թափեցին Մարտունու վրա, բայց մարտունեցիները՝ մեծ, ահել-ջահել, բոլորը կանգնել ու հերոսաբար կռվել են»։
