Իրանը երկար ժամանակ զինել է Համասը, Պաղեստինի խմբավորումները՝ նման օրվա համար, որ եթե Իսրայելն ուզենա տարածաշրջանում սպառնալ Իրանին, ինքը կարողանա այդ կերպ պատասխան տալ ու չեզոքացնել սպառնալիքը: Այս մասին մամուլի ասուլիսի ժամանակ ասաց «Հայաստան-Իրան ռազմավարական համագործակցության զարգացման կենտրոն» հիմնադրամի տնօրեն Փույա Հոսսեյնին:
Նա վստահություն հայտնեց, որ Իսրայելն առաջվա նման ազդեցություն չունի տարածաշրջանում, փոխվել են խաղի կանոնները, Իսրայելի անվտանգությունը շատ խոցելի է դարձել:
Հոսսեյնին անդրադարձավ նաև Հայաստանի և Անդրկովկասի հարցին և ասաց, որ արցախյան վերջին պատերազմից հետո տարածաշրջանում հակամարտության երկրորդ օջախն է բացվել:
Նրա խոսքով՝ Ադրբեջանն ամեն օր սպառնում է, Արցախից հետո Սյունիքի վերաբերյալ է ինչ-որ հայտարարություններ անում: Այն, ինչ կատարվում է Մերձավոր Արևելքում, ուղիղ կապ կարող է ունենալ Անդրկովկասում հակամարտության հետ:
Հոսսեյնին նշեց, որ ամեն կրակ կարող է մեծ հրդեհ բացել տարածաշրջանում: Դրա համար Հայաստանը պետք է գործընկերների հետ հարաբերություններն ամրացնի:
Նա, մասնավորապես, ասաց.«Հայաստանը պետք է ավելի հստակեցնի անվտանգության հարցը։ Իրանը ցանկանում է պաշտպանական և անվտանգության հարցով կոնկրետ պայմանավորվածություններ ունենալ Հայաստանի հետ, որը պետք է արտահայտվի վերջնական պայմանագրի ձևով, որպեսզի եթե Սյունիքի վրա հարձակում լինի, Իրանը կարողանա գործողություններ ձեռնարկել, որովհետև Սյունիքը, Իրան-Հայաստան սահմանն Իրանի համար շատ կարևոր է, դա կարմիր գիծ է, ինչպես նաև՝ պատուհան դեպի Եվրոպա»:
