Գորիս համայնքի ղեկավար Առուշ Առուշանյանի շնորհավորական ուղերձը սեպտեմբերի 1֊ի կապակցությամբ
Սիրելի հայրենակիցներ,
Այսօր, երբ բացվում են դպրոցների դռները և սկսվում է նոր ուսումնական տարին, մենք ոչ միայն տոնում ենք Գիտելիքի օրը, այլև վերահաստատում ենք մեր հավատարմությունը հայրենիքին և մեր ազգային արժեքներին:
Կրթությունը մեր ազգային անվտանգության հիմնաքարն է: Այն նաև զենք է, որով մենք պաշտպանում ենք մեր ինքնությունը, մեր լեզուն, մեր մշակույթը: Յուրաքանչյուր գիրք, որ բացում է հայ աշակերտը, յուրաքանչյուր դաս, որ լսում է հայ ուսանողը, ամրապնդում է մեր հայրենիքի հիմքերը:
Մեր պատմությունը լի է փառահեղ էջերով, որոնք պատմում են մեր նախնիների իմաստության, քաջության և նվիրվածության մասին: Այդ պատմությունը պետք է ոգեշնչի մեր երիտասարդությանը՝ դառնալու ավելի ուժեղ, ավելի իմաստուն, ավելի նվիրված հայրենիքին:
Հայ երիտասարդները մեր ազգի արմատն ու ապագան են: Ուստի, կոչ եմ անում բոլոր աշակերտներին և ուսանողներին՝ սովորեք ջանասիրաբար:
Այսօր, երբ աշխարհը լի է մարտահրավերներով, մեր կրթությունը պետք է լինի մեր վահանը և սուրը: Վահան՝ պաշտպանելու մեր արժեքները, և սուր՝ բացելու նոր ուղիներ դեպի առաջընթաց:
Թող այս ուսումնական տարին լինի նոր նվաճումների տարի: Թող յուրաքանչյուր հայ երիտասարդ դառնա իր հայրենիքի արժանի զավակը, պատրաստ պաշտպանելու և զարգացնելու այն:
Շնորհավոր Գիտելիքի օր:
