Գորիսը հավակնում է դառնալ աշխարհի ամենամաքուր քաղաքներից մեկը
Գորիսի համայնքի ղեկավար Առուշ Առուշանյանը հանդիպել է կոմունալ ծառայության աշխատակիցների հետ՝ ներկայացնելով քաղաքի մաքրության ապահովման նոր չափանիշները։
Թեև Գորիսն արդեն իսկ համարվում է Հայաստանի ամենամաքուր քաղաքներից մեկը, սակայն նոր նշաձողն ավելի բարձր է. Գորիսը պետք է դառնա աշխարհի ամենամաքուր և կանաչ համայնքներից մեկը։ Այս նպատակի իրագործման համար մշակվել է նոր աշխատանքային համակարգ՝ ըստ թաղամասերի բաժանումով, որտեղ յուրաքանչյուր աշխատակից պատասխանատու է կոնկրետ տարածքի իդեալական մաքրության համար։
Վերջին տարիներին էականորեն բարձրացվել են կոմունալ ծառայության աշխատակիցների աշխատավարձերը։ 2017 թվականի 50,000 ՀՀ դրամ աշխատավարձը ներկայումս հասել է 214,000 դրամի։
Համայնքի ղեկավարը նշել է, որ բարեխիղճ աշխատակիցները կշարունակեն խրախուսվել, իսկ անբարեխիղճ վերաբերմունքը կհանգեցնի աշխատանքից ազատման։
Նոր աշխատաոճի ներդրումը ևս մեկ քայլ է Գորիսը՝ որպես հարմարավետ, զբոսաշրջային և մշակութային կենտրոն, ավելի գրավիչ և հյուրընկալ դարձնելու ճանապարհին։
