Ավարտվեց Գորիս համայնքում անցկացվող «Դպրոցականների բասկետբոլի լիգա» մարզական խաղերի առաջին տարիքային խմբի՝ 5-6-րդ դասարանցիների համայնքային փուլը։ Խաղերի համայնքային փուլի կազմակերպիչը Գորիսի համայնքապետարանն է։
Այս փուլին մասնակցել են Գորիս, Տեղ, Տաթև համայնքների հիմնական և միջնակարգ դպրոցների աշակերտները։ Փետրվարի 14-ից մեկնարկած խաղերն անց են կացվել Գորիսի Ս․ Խանզադյանի անվան թիվ 6 հիմնական դպրոցի մարզադահլիճում։ Մրցավարական կազմի՝ «Գորիսի մանկապատանեկան մարզադպրոցի» մարզիչների և տարածաշրջանի դպրոցների ֆիզկուլտուրայի ուսուցիչների մասնագիտական պատրաստվածության և մեծ պատասխանատվության շնորհիվ խաղերն անցան բարձր մակադակով, խաղաղ ու ընկերական մթնոլորտում։
Այս տարիքային խմբում թեժ պայքարի արդյունքում հաղթող ճանաչվեց Գորիսի Ս․ Խանզադյանի անվան թիվ 6 հիմնական դպրոցի թիմը, երկրորդ հորիզոնականում Քարահունջի միջնակարգ դպրոցի թիմն է, իսկ երրորդում՝ Գորիսի Յու․ Բախշյանի անվան թիվ 3 հիմնական դպրոցի թիմը։
Առաջիկայում տեղի կունենան «Դպրոցականների բասկետբոլի լիգա» մարզական խաղերի երկրորդ տարիքային խմբի՝ 7-9-րդ դասարանցիների համայնքային փուլի խաղերը։ Համայնքային փուլից հետո երկու տարիքային խմբերում հաղթած թիմերը կմասնակցեն մարզային փուլին։
Շնորհավորելով հաղթող թիմերին՝ մեր պատանի մարզիկներին հաջողություններ ենք մաղթում նաև մյուս փուլերում։
